Pas një mungesë të gjatë, me përfundimin e studimeve dhe
nisjes së pushimeve i rikthehem miqësisë sonë të përbashkët virtuale, dashurisë
për librat dhe marrjes së kohës së nevojshme për një ripërtërije shpirtërore e
fizike, pas një dimri të gjatë e të lodhshëm.
Këto kohë leximet e mia janë përqëndruar në libra professional,
mbase asapk interesant për letërsidashësit, por të vlefshëm për zgjerimin e
horizonteve vetjake. Megjithatë, Botime PEGI nuk më lanë këto kohë ta harroja tërësisht
pasionin tim të zjarrtë për letërsinë. Një nga prurjet më të fundit në shqip
prej tyre është libri i një shkrimtari belg, fitues i Cmimit Europian për Letësinë
më vitin 2016 dhe triumfues i Cmimit të Debutuesve më vitin 2014,në vendin e
tij të origjinës, Belgjikën.
Libri ‘’Kam shumë për të thënë’’ shkruar nga Christophe Van Gerreway dhe përkthyer nga Irena Rama vërtetë u kthye në një mik besnik përgjatë
kohës, së cilës u zhyta në leximin e tij. Ky roman është ndërtuar në formën e
një rrëfimi publik mbi çështjet më private të një djali, të zhgënjyer nga
lidhja e fundit dhe të ngatërruar në mendimet dhe përditshmërinë e tij.
Gjatë shfletimit, qysh në faqet e para krijohet një lidhje e
veçantë mes lexuesit dhe narratorit. Mbase kjo ndodh si pasojë e thjeshtësisë
dhe çiltërsisë së trajtimit të dashurisë, problemeve dashurore, të cilat i
hasim çdo ditë, ndikimit të teknologjisë në jetët dhe marrëdhëniet tona dhe zbulimit
të vetes në ngjarje të caktuara a karakteristika të personazheve.
‘’Kam shumë për të dhënë’’ është një tregim i sinqertë mbi
dashurinë, ndarjen, zhgënjimin, gabimet, pendesat dhe depresionin. Narratori,
qysh në fillesat e hershme të librit nis shkrimin e një letre. Kjo letër edhe
pse disi e ngatërruar dhe e ndërlikuar dhe tërësisht e pangjashme me formatin
tradicional të letërkëmbimit, merr trajta të ndryshme, duke e kthyer lexuesin
herë në retrospektiv e hërë në përditshmëri. Kështu, me çiltërsi, respekt dhe
inteligjencë të theksuar emocionale rrëfehen edhe detajet më të imta të një
marrëdhënie dashurie të lindur në ishullin e bukur të Kretës, përgjatë
pushimeve të të rinjëve. Historia rrjedh me udhëtimet e shumta të çifitit,
monotonisë së krijuar në përditshmërinë e tyre, hasjen e një mungese
komunikimi, e cila krijon male të tërë pengesë për bashkimin emocional të tyre
deri në kufijtë e ndarjes dhe zhgënjimit.
Së pari, në këtë libër më pëlqeu thjeshtësia, e cila e bën përnjëherësh
të afërt me secilin lexues. Një nga vyrtytet e kultivuara përgjatë leximeve është
empatia, por ky libër nuk kërkon domosdoshmërisht një lexues shumë të stërvitur
për t’u përvetësuar dhe këtë e konsideroj mjeshtëri të autorit. Afërsia me ngjarjet, personazhet dhe copëzat e kujtimeve bën që
gjatë gjithë leximit, lexuesi të zhytet në mendime, të kthehet në retrospektiva
personale dhe të mundohet të zgjidhi pikëpytjet e mbetura prej marrëdhënieve të
tij.
Së dyti, sinqeriteti me të cilin trajtohet çdo element gjatë
librit e kthen narratorin në një mik të besuar, me të cilin mund të ndash
mendimet e të krijohet ndjesia se çështjet e zemres sa të ndryshme janë edhe
kaq të ngjashme dhe ti nuk je i vetmi, që përjeton situate të koklavitura
emocionale. Ky libër mund të konsiderohet si një seancë terapetutike për zemërthyerit
dhe zemërplotët, sepse sado harmonike të jetë një marrëdhenie, jeta nuk është
një parajse pa rrufe, shkrepëtima dhe shira të vrullshëm.
Së treti, gjatë librit preken tema të rëndësishmë mbi marrëdheniet
njerëzore, miqësinë dhe dashurinë dhe mbase i jepen përgjigje disa tabuve dhe
dilemave sesi marrëdhëniet përfundojnë ose transformohen.
Në përfundim mund të them se si vetë titulli i tij, ky libër
më krijon ndjesinë se kam edhe unë shumë për të thënë. Ndjeva vërtetë një
bashkim emocional me ngjarjen, mënyrën e trajtimit dhe personazhet. Një libër i
shkruar bukur, pa ndërlikime, thjeshtë dhe me shumë ndjenjë.
Ju ftoj në leximin e ‘’Kam shumë për të thënë’’ shkruar nga
Christophe Van Gerrewey!
Rilexohemi shumë shpejt,
©RE
*Ky artikull nuk lejohet të ribotohet pa lejen e autores.
Kontaktoni: njetuferrezeshneperre@gmail.com
Comments
Post a Comment