''Ato qe mbeten janë vetëm kujtimet.''
Thënia e lartpërmendur është aq
sa mallëngjyese për kohën që kalon e ne nuk e kthejmë dot pas, por aq edhe
edukuese në të njëjtën kohë. Të kuptosh rëndësinë e vërtetë të sendeve
materiale dhe përshtjellimeve abstrakte, do të thotë të rritesh dalë-ngadalë.
Sot, do të flasim për një nga aktivitetet më interesante dhe njëkohësisht një
nga veprimtaritë teë ndermarra personalisht që shërbejnë për rritjen tënde
mentale dhe emocionale, për të mbajturit e një ditari.
Unë për herë të parë u
prezantova me ditarin në moshën 7 vjecare. Një nga dhuratat që gjyshja ime e
shtrenjtë, me kushtoi ishte nje ditar i bukur lejla, me nje kopertinë të shëndritshme
plot xixa e xhingla, me një celës të vogël e me fletë plot ngjyra. Ajo më
tregoi historinë e Anës së njohur në të gjithë botën për ditarin e saj dhe më tregoi sesi në vitet e zymta të luftës
Ana gjente lumturinë duke shkruar edhe pse e ngujuar në bodrumin e një fabrike
të vjetër, ku jashtë saj bucisnin bombardimet.
E embla ime, më këshilloi që
ditarit ti vendosja një emer, ta shikoja si mikeshën time të shtrejtë me të cilën
mund të ndaja gjithcka e ti besoja cdo
mendim që kalonte përtej mendjes sime. Ajo propozoi që ditari im vajzëror ngjyrë
lejla te pagëzohej me emrin Kiti, njësoj sic e quante dhe Ana.
Për vite me rradhë, që prej
moshës 7 vjecare e deri më sot, unë ende shkruaj në ditar dhe e konsideroj
ditarin si kutinë time të kujtimeve, me të cilat qesh e përlotem sa herë i
kthehem fleteve të shkuara. Të paturit një ditar, do të thotë të zotërosh në duart e tua një provë përjetimesh,
një tufë kujtimesh të harruara prej përditshmërisë dhe një thesar të vërtetë, të
cdo dite të jetës tënde.
Pak nga pak do shpalos me ju të
gjitha përfitueshmeritë që përvetëson individi duke shkruajtur në ditar:
1.CLIROHESH NGA TRISHTIMI,
STRESI, LODHJA.
Jo më kot thonë se fleta duron
më shumë se njeriu. Ajo ka një aftësi magjike që dhimbjen ta kthejë në forcë, e
lotët t’i shëndrrojë në ylbere ëndrrash dhe shprese. Pas një dite të lodhshme të
derdhesh ngjarjet e ditës dhe mendimet e tua në ditar, do të thotë të zhvishesh
nga pesha e rëndë e negativitetit të perjetuar ne përditshmëria. Të shkruash do
të thotë të kryesh një terapi clodhëse për veten.
2.PËRMIRËSON AFTËSITË SHPREHËSE.
Dy janë menyrat për të qënë
orator të sukseshëm, të mos lodhesh së lexuari gjithcka që të bie në dorë e t'i
japësh vetes cdo ditë kohë për të hedhur mendimet në letër. Të shkruarit është
një proces, i cili ndihmon trurin të përpunojë informacionin në një mënyrë
me shprehëse, por elementi që e ndihmon të shkruarin është natyrisht fjalori i
pasur, i cili grumbullohet si një bagazh që e mban mbi vete vetëm nga të
lexuarit.
3.MBAN KUJTIMET TË GJALLA.
Të lexosh ato qe ke përjetuar
do të thotë që ato momente t'i përjetësosh.Teksa lexon,detajet e imtësishme të
kthejnë buzeqeshje të vockla dhe reflektimet mbi gabimet e së shkuarës, të
cilat duke i rikujtuar ndihmon veten qe
të mos i përsërisësh.
4.NJEH MË MIRË VETEN.
Nga të shkruarit në ditar mund
të kapërcesh nga një temë në tjetrën dhe të shkruash mendime të cilat as që i
dije që flinin në ty. Ditari është forma më ndihmuese për të njohur thellësisht
botën tënde emocionale. Cdo ditë mund të zbulosh një reflektim të ri.
Për ta përmbledhur, ditarët janë
dhurata më e mirë që mund t'i bësh vetes tënde. Pasi të kesh shkruar qoftë edhe
një herë të vetme do e kuptosh sesa të ndihmon me vetëkontrollin, përforcimin e
aspekteve të tua më të mira dhe abandonimin e gabimeve.
Beje përpjekjen tënde të parë që sonte. Rrëmbe bllokun tënd të
preferuar dhe shpreh gjithë gezimet e dufin tënd. Ti je unik!
Lexohemi së shpejti,
©RE
Comments
Post a Comment