Në Klubin e Librit #rrembelibrin, gjatë muajit Mars lexuam së bashku një nga librat më të bukur të një autori brilant të letrave shqipe, Fatos Kongoli me romanin ‘’Lëkura e qenit’’. Ky roman është një shëmbëlltyrë e pastër e përjetimeve dhe ndryshimeve që pëson ndërgjegja njerëzore mes dy sistemeve politike.
Kongoli paraqet reflektimet si në pasqyrë të tranzicionit emocional të individit dhe shtrëmbërimeve të vyrtyteve të tij prej veseve njerëzore, shoqerisë, egos , ambicies dhe opinionit.
Thelbi i këtij romani është rëndësia e dëgjushmërisë me vëmendje të zërit të nënvetëdijes,zëri i cili të qorton herë me të drejtë dhe herë jo dhe zëri që të inkurajon e të jep zemër. Ky është zëri i së vërtetës, zëri që kumbon kujtimet dhe rikthen përjetimet. Ky është zëri që thërret në mendje dhe zemër për dashuritë e shkuara, për fëmijërinë e ëmbël dhe gabimet e cdo faze të jetës.
Romani i Kongolit bazohet thellësisht në retrospektiv dhe duket se përforcon dhe një herë mendimin se vegjëlia është faza më e rëndësishme e jetës dhe periudha e ndërtimit të vyrtyteve më thelbësore të individit të cilat do ta shoqërojnë gjatë gjithë këtij udhëtimi të gjatë.
Ky është një roman i sinqertë dhe vërtetësia e tij lexohet në cdo fjalë, teksa gjen veten dhe jeton mes ngjarjesh të panjohura, por ngjarje që të krijojnë idenë se ke dëgjuar për to dhe i ke përjetuar pak nga pak. Ngjarjet rrotullohen rreth Krist Tarapit, emri i të cilit i krijonte keqkuptime në cdo situatë. Libri nis me një përkujtimore të fëmijërisë së tij, të ëndrrave dhe dëshirave të cilat e ndoqën deri në moshën më të vonë. Vitet e tjera të jetës ishin më të gjalla dhe të larmishme, të bukura, të mbushura me përpjekje por të finalizuara me dashuri, dashuritë prej të cilave nuk hoqi dot dorë.
Një nga rastësitë më të bukura të librit të ndërtuar me kast nga autori është ndërtimi i jetës së tij emocionale dhe dashurore me tre breza të ndryshëm grash, të cila me njera-tjetrën kishin marrëdhenie të ngushta familjare. Këto tre gjurmë dashurish në jetën e tij e bënin jetën e tij të pazgjidhshme nga Liza, Dolora dhe Lori.
Gjithashtu, një aspekt për t’u përmendur pas leximit të këtij romani është historia mbërthyese për lexuesin dhe mënyra mjeshtërore e të shkruarit nga Fatos Kongoli, i cili e kthen këtë roman në një kujtesë historike, emocionale dhe shpirtërore. Ky roman përvecse një histori për të mos u humbur është një mënyrë e mirë për të njohur një aspekt tjetër të viteve kur në Shqiperi sundonte Hadi.
#rrembelibrin ‘’Lëkura e qenit’’ nga Fatos Kongoli.
Lexohemi javën e ardhshme,
©RE
©RE
Comments
Post a Comment