Ditët që vijojnë janë fundjava e fundit para vitit të ri
shkollor. ( Kjo fjali tingëlloi sikur doja të thoja ‘’Qetësia para furtunës.’’).
Në të vërtetë, nisja e shkollës nuk ka vend për panik, ankth apo mërzitje. Përkundrazi,
rubrika e re #dituri në ‘’Një tufë rrezesh nëpër RE’’ lindi për të shërbyer si
burim frymëzimi. Së bashku, do ndihmojmë njëri – tjetrin me këshilla studimi,
energji pozitive dhe mbi të gjitha me durim e vullnet për të qënë më afër pikësynimeve
të vendosura për këtë vit të ri.
Paniku para nisjes së shkollës, nganjëherë është i vështirë të menaxhohet. Pazaret e ditëve të
fundit, rradhët e gjata nëpër qendrat tregtare për kryerjen e blerjeve të materialeve që do na shërbejnë gjatë vitit të
ri shkollor, ritualet e përvitshme dhe mëdyshjet për cantat e mjetet shkollore
janë vetëm disa nga kokëcarjet që i bëjnë të gjithë të vrapojnë këto dite.
Më poshtë do gjeni pesë mënyra si të ruani qetësinë dhe të
largoni panikun gjatë kësaj fundjave.
1. Shkruaj synimet e tua për këtë vit shkollor.
Kur bëhet fjalë për dijet, njohuritë dhe jetën shkollore
mund të themi se nuk ka rëndësi vetëm rrugëtimi përgjatë një viti, por edhe
rezultatet në fund të tij. Një nga veprimet e para, që duhet të ndërmerrni mes
rrëmujës së këtyre ditëve është pikërisht të uleni e të shkruani synimet, të
cilat do i vendosni vetes. Ndër to mund të jenë arritja e rezultateve të larta
në mësime; pjesëmarrja në klubet sportive dhe artistike, të cilat shkolla juaj
organizon; shoqërizimi me të tjerët etj.
2. Lista e blerjeve.
Një listë e përgatitur paraprakisht për të ndihmuar gjatë
pazareve tuaja është një ndihmë e vërtetë. Përgatisni një listë me produktet
shkollore dhe një tjetër për veshjet që ju duhen.
KUJDES: Të rreshtosh një liste të pafund është e thjeshtë,por
para se të shkruani nevojat tuaja më parë shikoni mirë se cfarë keni dhe blini
vetëm produktet që vërtetë ju nevojiten.
3. Riorganizo dhomën
Në përgjithësi gjatë verës, nxënësit dhe studentët e
braktisin këndin e studimit të paorganizuar dhe të crregullt, ashtu sic e kanë
lënë në castin kur shkolla përfundoi. Asgjë e bukur nuk mund të lind në atë
pirg librash të parregullt dhe lum lapsash e stilolapsash të rrëmujshëm. Nisni
me organizmin e sirtarëve të dedikuar për pajisjet e kancelarisë, atë të
fletoreve dhe krijoni një hapësirë të re në bibliotekën tuaj për librat e këtij
viti shkollor.
4. Mendo pozitivsht.
Nganjëherë duket sikur kjo shprehje eshte kthyer në klishe
dhe është thjesht një mënyrë të thëni. Në të vërtetë nuk është vetëm kështu. Të
jesh optimist e të ndërtosh vetëbesim është gjysma e rrugës së suksesit. Kini
besim se do shkëlqeni në rrugën e dijes dhe ndër të tjera do argëtoheni mes jetës
shkollore.
5. Krijoni rituale të shëndetshme.
Një mënyrë e shëndetshme jetese ndikon shumë tek ecuria juaj
dhe rezultatet në shkollë. Përvec orëve të gjata të studimit dhe përkushtimit në
shkollë, kujdesuni për dietën tuaj ushqimore, për orët, të cilat duhet t’i kushtoni
në argëtimin tuaj e gjithashtu për të minimizuar ankthin dhe panikun, që mund të
na pushtojë gjatë periudhës së shkollës.
Në përfundim, ju kujtoj të ruani qetësinë, të shijoni
procesin e nisjes së vitit të ri shkollor dhe të shkëlqeni.
PS: Mos harroni, ‘’Një tufë rrezesh nëpër RE’’ është një
mik, i cili do ju ndihmojë gjatë studimeve tuaja.
Vit të mbarë shkollor !
Comments
Post a Comment