Stina e vjeshtës kalohet më bukur në shoqërinë e një libri të
mirë. Libri i parë për vjeshtën, të cilin zgjodhëm të lexojmë së bashku në
Klubin e Librit #rrembelibrin është shkruar prej një nga autorëve më të dashur
te letersise frenge, Albert Kamy.
Subjekti i romanit përshkruhet nga tre vdekje të rëndësishme,
të cilat shënjojnë përgjithmonë rrjedhën e ngjarjeve. Personazhi kryesor, Merso
një djalë pa angazhime serioze dhe në përgjithësi një njeri, i cili e merr jetën
lehtë ishte një njeri i pazakontë. Mënyra sesi e konceptonte jetën, vdekjen,
opinionin e të tjerëve, fakti qe ishte thuajse i pandjeshëm ndaj dashurisë e shumë arsye të tjera e bejnë Musoin një
personazh atipik.
Në pjesën e parë të romanit, Merso mëson për humbjen e së ëmës,
e cila jetonte prej vitesh në një shtëpi për kujdesin e të moshuarëve. Përpara
kësaj vdekje, cuditërisht ai duket i ftohtë, e kapërcen dhe e pranon. Më pas
Merso përballet për të dytën herë me vdekjen, por këtë herë në rolin e një vrasësi.
Këmbëza e armës shkrepet padashur, teksa dielli i pengon shikimin dhe e verbëron.
Pas vdekjes së arabit, gjithë jeta e tij shkërmoqet e merr një tjetër kthesë. Në pjesën e dytë të romanit, Merso ndodhet në
burg dhe ecejaket e vetme të tij janë në birucin pa dritë e të ndotur. Mendimet
e tij vërtiten përreth gjykatave, akuzës për vrasje, ndëshkimit me vdekje dhe
jetës së tij. Merso është i huaji për këto që e njeh dhe mbetet i huaj edhe
para vetes deri në fundin e tij. Ai mbetet një fajtor pa faj, i cili e pranon
krimin, por duke i lënë fajin diellit. Merso konsiderohet një personazh i
absurditetit.
Në diskutimet e Klubit të Librit, Gerta shprehet për ‘’ I
huaji’’ si më poshtë:
‘’ Ky libër më rrëmbeu, më preku dhe më bëri ta lexoj brenda
një natë. Më kaloi në mendje si një film, ndërkohë që e lexoja.’’
Një tjetër lexuese shkruan:
‘’Gjatë leximit ky libër me lodhi shumë e mezi prisja ta
mbaroja, por mendoj se ia vlen ta lexosh, pasi të bën të mendosh me qartë.’’
Mikesha tjetër në Klubin e Librit shprehet:
‘’Për mua Mersoi duke qënë personazh kryesor shtrihet në dy
linja. Së pari, jeta e tij brenda ‘’pallatit me banorë të cuditshëm’’ dhe së
dyti portretizimi i tij. Përsa i përket jetës në pallat, i cili nuk është gjë
tjetër veçse një godinë me hyrje, dhoma që dyert e të cilave përfaqësojnë,
hyrjen për te ndjenjat, te ndërgjegja, tek emocionet dhe për të prekur kujtimet
e tij jetime. Ai nuk është i huaj vetëm për botën, por ajo që është
më e rëndësishme, ai është i huaj për veten,
pasi AI nuk njeh dyert e qënies së tij.
Gjithashtu duke u mbështetur te portretizimi i Mersoit , e
kjo si rezultat i shumë përshkrimeve pa ngjyrë. Mersoi nuk është një personazh
bosh, as i humbur apo i pushtuar nga egoizmi, brutaliteti, por ai është një pikturë
e realizuar me laps, ku emocioni nuk mund të ndjeki ‘’ëndrrat’’ e ngjyrave.
Mersoi jeton në kornizën që i thur vetëvetes."
Në përfundim, ju ftoj në leximin e këtij romani të
jashtëzakonshëm, i cili do ndryshojë botëkuptimin tuaj për jetën, vdekjen dhe
marrëdhëniet me të tjerët e veten.
Rilexohemi javën e ardhshme,
©RE
©RE
Comments
Post a Comment