Gëzuar!🥂

Sa më shumë rritem aq më shumë i largohem shpirtit të zakontë të festave! Mbase kjo është sëmundja e të rriturit. Në bilancin personal të lumturisë e trishtimeve, sukseseve e dështimeve nuk di përse, por unë i harroj shpejt të këqijat. Nuk jam e sigurtë nëse ky vit ishte vërtet kaq i mirë apo memoria ime ësbtë plot plane e ëndrra dhe kam harruar të gjithë mërzitjet, netet kur bashkë me hënën i kërkoja Zotit shpresë e zemrës durim; agimet kur bashkë me yjet shuaja dritat e ëndërrimeve e kthehesha me këmbë në tokë për një ditë tjetër të zakontë, me ecjen e nxituar të mëngjesit, mjegullat e mendimeve, sytë e përgjumur e tronditjen nga e përditshmja.

Cdo vit e më shumë kuptoj se vezullimet e dritave zbehen sa më shumë njoh zymtësinë e botës së të rriturve e zbrastësinë e shpirtrave të mbërthyer nga tundimi për para, pushtet e egoizëm.Stolitë e qytetit, zilet tringëlluese, fjongot e lulet e Krishtlindjeve nuk arrijnë të ngrohin zemrat. Këtë e bën vecse dashuria!

Kryefjala e këtij viti ka qënë dashuria, ëndrrat, të vërtetat!

Këtë vit nuk kam pritur festat për të qënë e hareshme, por kam kërkuar me shpresë buzeqeshjet cdo ditë. Optimizmi dhe durimi më kanë shoqëruar e prej tyre kam mësuar se gjithcka arrihet më lehtë. Jam mirënjohëse për një vit plot eksperienca, ëndrra të realizuara, dashurinë pakushte të më të dashurve.

Duke u rritur kam kuptuar se kënaqësia më e madhe nuk është të realizohen dëshirat e tua, por të përjetosh lumturinë duke i dhuruar të tjerëve.  Prandaj për vitin që po troket nuk kam renditur qindra ëndrra e dëshira, por disa dhurata që uroj të arrij t’i jap atyre që dua. Unë nuk jam e magjepsur nga materia, ndaj gjithcka dua është ngrohtësi, harmoni, shëndet e pozitivitet.

Gjithashtu nuk kam harruar të tregohem mirënjohëse e falenderuese ndaj Zotit për një vit të mirë, plot shëndet e begati; të afërmve për sakrificat, dashurinë e përkushtimin e tyre e gjithashtu juve që qëndruat me Një tufë rrezesh nëpër RE edhe për një tjetër vit.

Uroj që dymbëdhjetë muajtë e ardhshëm të mbushin zemrat me lumturi, të jenë të paqta e ky vit të jetë më i drejtë me ata që jeta i ka rrëzuar plot herë, por gjithnjë e kanë gjetur forcën të ringrihen. Gëzuar!

©RE

*Ky artikull nuk lejohet të ribotohet pa lejen e autores. 
Kontaktoni: njetuferrezeshneperre@gmail.com