Viti 2018 mund të quhet lirisht viti i kujtesës historike të
shqiptarëve. Gjatë këtyre muajve përkuan tri përvjetore të rëndësishme për
vendin tonë sic janë: Përkujtimi i 550 vjetorit të vdekjes së heroit tonë
kombetar, Gjergj Kastriot Skenderbeu ; 110 vjetori i mbajtjes së Kongresit të
Manastirit dhe gjithashtu 140 vjetori i themelimit të Lidhjës së Prizrenit.
Këto tri përvjetor të rëndësishëm, të cilët në zemër të tyre
thërrasin bashkimin e shqiptarëve jo vetëm në ditë festash, atdhedashurinë,
respektin e përuljen ndaj të parëve dhe dedikimin e punës e ëndrrave tona në këtë vend, me siguri pa
kontestime të palëve të ndryshme ia kushtojnë këtë kujtesë të rëndësishme historike
Gjergj Kastriot Skenderbeut.
Në këtë atmosfere festash, alegrie, patriotizmi dhe krenarie
për kombin tonë në Një tufë rrezesh nëpër RE zgjodhëm që libri i muajit Nëntor
në Klubin e Librit #rrembelibrin të ishte pikërisht ‘’Skenderbeu’’ shkruar nga
Sabri Godo.
Së pari duhet permendur se Skenderbeu është figura historike
shqiptare për të cilin janë shkruar me shumë vepra letrare dhe publicistike.
Autorët e këtyre veprave kanë qënë të kombësive të ndryshme, shkrimtarë, publicistë,
gazetarë, skenaristë, historianë etj. Figura e Skederbeut është përfshirë në
cdo fushë të artit dhe ka lënë gjurmët e saj në historinë botërore.
Libri i parë i shkruar në gjuhën shqipe për ngjarjet e
periudhës së Pushtimit nga Perandoria Otomane dhe udheheqjen e prijësit tonë mban
firmën e Marin Barletit në formën e një kronike historike. Ngjarjet e paqyruara
nga Barleti si kronikant, historian dhe humanist janë përdorur më vonë si burime në veprat e
Nolit, Frashërit, De Rada, Vreto, Kadare dhe Godo.
Në Klubin e Librit #rrembelibrin nuk donim t’i largoheshim
shumë letërsisë edhe pse zgjodhëm një libër historik, prandaj zgjedhja jonë nuk
mund të ishte tjetër vecse ‘’Skenderbeu’’ i autorit Sabri Godo.
Ky libër renditet ndër më të vecantët shkruar per heroin tonë
kombëtarë. Në qendër të librit rrjedhin betejat, përpjekjet për clirim, dëshira
për liri, vullneti për bashkim, strategjitë diplomatike, urtësia dhe marrëveshjet,
lufta për vendin tonë, pra ngjarjet historike, të rrëfyera qartë, më shumë
elegancë dhe që bëjnë t’i lexojë me endje edhe një lexues jo entuziast ndaj
historisë.
Vecantia e Godos në trajtën që i ka falur veprës është
dimensioni njerëzor i Skëndërbeut. Deri më atëherë, Gjergj Kastrioti paraqitej si
një trim sypatrembur, i ashpër, krenar dhe luftarak, por askush nuk kishte
nxjerr në pah shpirtin e tij të butë, dashurinë për familjen, përuljen ndaj
prindërve, përkushtimin ndaj të shoqes dhe adhurimin për Shqiperinë. Sabri Godo
e zbret Skenderbeun nga piedestali i heroit e kthen në një njeri të zakontë prej
mishi e gjaku, ia zhvesh plackat e rënda të lavdisë dhe tregon se edhe heronjtë
dinë të lotojnë, të ndjejnë e të duan.
Merita e autorit të kësaj vepre është thjeshtëzimi i një figure kombëtare, e cila
njihet vetëm për aspektin historik, politik dhe vendimmarrës dhe pak për
tharmin e shpirtit, ndërgjegjen e tij dhe mendimet.
Për ta përmbledhur mund të them se ndër elementët më të
bukur të librit janë dialogjet , përshkrimi i mendimeve të personazhit kryesor,
trajtimi i ngjarjeve, përshkrimi i gjallë dhe i hollësishëm i mjedisit dhe
nuancat me të cilat ngjyrosen personazhet dhe stili i vecantë i autorit.
Ju ftoj në leximin e librit historik ‘’Skenderbeu’’ shkruar
nga Sabri Godo.
Rilexohemi javën e ardhshme,
©RE
*Ky artikull nuk lejohet të ribotohet pa lejen e autores.
Kontaktoni: njetuferrezeshneperre@gmail.com
Comments
Post a Comment