''Xhejn Er'', vajza që na mëson të shurdhohemi para paragjykimeve

Ditët e fundit kanë qënë të lodhshme dhe të rrëmbyera dhe e vetmja mënyrë që mund të më sillte më tepër shpresë dhe të më frymëzonte se guximi gjendej brenda meje edhe pse më dukej se e kisha harruar diku gjetkë ishte një libër klasik, nga ata të cilët koha që kalon vetëm sa ia shton vlerën e i bën më të dashur në sytë e mi, ‘’Xhejn Er’’ nga autorja Charlotte Brontë.

Charlotte  Brontë është një shkrimtare angleze e shekullit të 19-të, e cila me letersinë që shpalosi revolucionarizoi botën, opinionin publik dhe dha një mësim të vlefshem sesi t’i  djegim në ferr paragjykimet.

Personazhi kryesor i romanit, rreth të cilës vërtiten të gjitha ngjarjet është Xhejn Er, një vajzë e rritur me mijëra vështirësi, jetime, e dhunuar psikologjikisht, fizikisht dhe emocionalisht, por e transformuar në një grua të hekurt, plot dinjitet dhe të guximshme.

Teksa lexon rreshtat e librit duket sikur gjithë jeta e Xhejn Er ishte e destinuar të kapërcene hendeqe dhe pengesa qysh prej vegjëlisë, por karakteri që ajo zhvilloi si një grua sypatrembur, e papërkulshme as prej paragjykimeve dhe as prej dhimbjes të bën të reflektosh mbi edukimin e vajzave dhe grave.

Xhejn Er është simboli i vajzës rebele, e cila lufton deri në fund për lirinë e saj, pavarësinë dhe vetëvendosjen. Forca e saj e brendshme, energjia diellore dhe guximi për të ecur përpara me krenari e bëri Xhejn Er personazhin  qe frymëzon cdo vajze. Gjthashtu këmbëngulja e saj për të përjetuar dashurinë  e vërtetë me Rocesterin, punëdhënësin e rreptë është një nga pjeset më të bukura të librit. Historia e dashurisë është e vecantë dhe jep mesazhe të forta sesi njerezit duhet të vendosin jetën e tyre para opinioneve shkatërruese të të tjerëve.

Mënyra me të cilën është shkruar libri, por njëkohësisht edhe shqipërimi mjeshtëror nga Alina Karaulli i shtojnë vlerë rrefimit. Autorja Brontë , e cila e shkroi këtë roman në formën e nje gjysmë-autobiografie u kryqëzua nga kritika në kohën e botimit. Shumë e quajtën këtë libër të papërshtatshëm për moralin që predikon, antifestar, të shthurur dhe e damkosën këtë libër klasik me qindra paragjykime, sic lexuam në libër gjatë gjithë përjetimeve te Xhejn Er për gjykimet e cdonjerit mbi dashurinë e saj dhe forcën, që i falte kjo ndjenjë për të luftuar gjithë botën.

Për ta përmbledhur, ky libër është një nga librat që do të transformojë botëkuptimin tuaj mbi lirinë e individit, dashurinë,aftësinë për të marrë në dorë vrerët e jetëve tuaja. Mendoj se është një histori e ngjashme me dhjetra të dëgjuara apo përjetuara në vendin tonë, ku mentaliteti mundohet të kontrollojë të ardhmet tona. Lexojeni këtë dhjetor dhe do frymëzoheni për t’i thënë JO paragjykimeve mbytëse dhe mentalitetit të kalbur.

Ju ftoj në leximin e librit ‘’Xhejn Er’’ nga autorja Charlotte Brontë.

Rilexohemi javën e ardhshme,

©RE

*Ky artikull nuk lejohet të ribotohet pa lejen e autores. 
Kontaktoni: njetuferrezeshneperre@gmail.com