"Tre ujqit e vegjël" rikthimi te toleranca, dashuria dhe fëmijëria

Ditët e fundit kanë qënë të ngarkuara, të lodhshme dhe të mbushura me stres, ankth, lexime deri në orët  e para të mëngjesit dhe të parehatshme për shkak të sezonit të provimeve, të cilave i erdhi fundi. 

Këto javë, krahas librave të mbushura me teori mbi botën financiare dhe ushtrime të panumërta, mbërriti  në duart e mi një thesar i vockël, si për të përkëdhelur fëmijën brenda meje e për të më kujtuar naivitetin e të voglit.

''Një tufë rrezesh nëpër RE'' nuk lexohet vetëm prej të rinjve, por dhe prej prindërve, prandaj  hapësira e librave për të vegjël do të jetë e herëpasherëshme.

 Sot do ju flas për ‘’ Tre ujqit e vegjël’’, një përrallë e këndshme, e cila është shkruar plot humor e ëmbëlsi nga autori grek Evjenios Trivizas, kombinuar me ilustrimet plot ngjyra e fantazi nga Helen Oxenbury dhe shqipëruar nga Romeo Çollaku.

Të gjithëvë u kujtohen ‘’Tre derrkucët’’ e famshëm dhe aventurat e tyre për të ndërtuar një shtëpi të bukur e të sigurtë për t’i shpëtuar ujkut të pabesë dhe dinakërive të tij. Epo kësaj rradhe rolet janë ndryshuar. Tre ujqit e mirë e naiv janë ata, që duhet të gjejnë lloj e soj mënyrash sesi  t’i mbijetojnë rrengjeve të  Runi-Runit, derrit të keq e dinak. Rrëfimi përfshin disa prej kafshëve të xhunglës, të cilët ndihmojnë tre vëllezërit ujq dhe qasja e përrallës me sendet e jetës moderne të përdtshmërisë e bën eksperiencën e leximit argëtuese, po aq sa të mbushur me mësime të bukura.

Ngjashmëria e historisë me përrallën ‘’Tre derrkucët’’, e cila ka qënë më e dashura për mua gjatë viteve të para të jetës më bëri të filloja të paralelizoja ndërkohë që lexoja, por sensin e krahasimit e humba shpejt, sepse ngjarjet e ujqve më përfshin të tërën.

Së pari, ky libërth përcjell mesazhe dashurie, paqe e miqësie dhe të mbush zemrën plot. Largimi nga klishetë e përrallave se ujku është gjithnjë personazhi antagonist dhe prurja e kësaj kafshe në këtë libër si një personazh i brishtë e pozitiv është një gjetje. Përrallat janë promotori i parë i vlerave, që kur nisim t’i lexojmë vogëlushëvë  e krijimi i një atmosfere të paqtë, pa paragjykime dhe larg rregullave të zakonta, veçse çliron mendjet e tyre e në vend të ndërtojë një mur , veçse  krijon një urë dashurie.

Së dyti, gërshetimi i kafshëve ekzotike me derrin e ujqit në realitet mund të duket e pamundur për shkaqe gjeografike dhe klimaterike, por kjo është magjia e përrallës dhe një prej mesazhe të bukura të saj. Kjo përrallë i përgatit fëmijët për një botë pakufij e pabarriera, plot me miq e të pushtuar nga globalizimi.

Së treti, një nga elementët e mi të preferuar të përrallës është fundi i saj. Pas gjithë atyre ligësive të derrit Rum-Rum, tre vëllezërit ujq, jo vetëm e falën dhe ftuan në shtëpinë e tyre të ëndrrave, të ndertuar me lulet më të bukura të botës, por lodruan e deshën si të mos kishte pasur kurrë rrezik prej tij.

Në përfundim mund të them se ky libër nuk është vetëm për fëmijët dhe fatkeqësisht të rriturve I duhet të lexojnë herë pas herë librat e të vegjëlve për të kuptuar se çfarë po bëjnë gabim dhe se kanë harruar vlerat e vërteta. Lexojeni ‘’Tre ujqit e vegjël’’ së bashku me vogëlushet e përveçse do argëtoheni e do vendosni buzën në gaz, fëmijët do përvetësojnë një tufë me mësime, ndërsa të rriturit do reflektojnë për gabimet e tyre.

Lexohemi së afërmi,


©RE

*Ky artikull nuk lejohet të ribotohet pa lejen e autores. 

Kontaktoni: njetuferrezeshneperre@gmail.com