Një kohë e shkurtër shkëputje nga librat, leximet letrare
dhe gjithçka që ma mbush zemrën me kënaqësi e frymëzim mund ta justifikoj me
dhjetra përgjegjësi e kokëçarje shkollore. Megjithatë, për to do t'ju flas një
herë tjetër.
Libri, të cilin kam zgjedhur të ndaj sot me ju është një
roman mjaft i njohur në mbarë botën e njëkohesisht edhe për lexuesit shqiptarë. Ky
libër ka krijuar diskutime të mëdha duke rikthyer në vëmendje jetën e
vërtetë të një prej shkrimtarëve më të dashur të globit, nga këndvështrimi i gruas së tij të parë.
"Një grua në Paris" shkruar nga Paul McClain është
libri që rrëfen në mënyrën më të ndjerë
prapaskenat e martesës së parë të shkrimtarit Ernest Hemingway me Hadlei Richardson. Hadlei ishte gruaja e veçantë, e cila e ndryshoi përjetësisht
Ernestin në aspektin njerëzor dhe atë profesional. Pavarësisht të gjithë jetës
së tij pa themele, martesës së vështirë me Hadlein dhe historive të tjera
dashurore, martesa e tij e parë mbeti e rëndësishme dhe Hadlei pati ndikimin
thelbësor tëk ai.
Takimi i tyre i parë ndodhi në Cikago më 1920, kur Hadley
Richardson ishte njëzet e tetë vjeçare, e
cila pas disa zhgënjimesh kishte hequr
dorë prej dashurisë. Njohja me Ernest Hemingëay bëri që jeta e saj të merrte një
tjetër kthesë. Pas pak kohësh, çifti zhvendoset në Paris, ku jeta sociale pësoi
një hov dhe u lidhën miqësitë me Gertrude Stein, Ezra Pound dhe F.
Scott dhe Zelda Fitzgerald.
Jeta në Paris, mes mbrëmjeve të mahnitshme të muzikës Jazz
dhe shfrenimeve të pakufijëta vendosi jo rrallëherë në pozita të vështira
konceptin e familjes së shëndoshë dhe ngriti pikëpyetje për martësën e çiftit. Ernesti i ri dhe i mbushur me ëndrra për të
lënë gjurmë në botën e letrave e për të jetuar çdo eksperiencë që jeta i
sillte përpara pa e menduar dy herë gjendet përballë së shoqes Hadley, e cila përpiqej
të mbante ekuilibrat në familjen e tyre, si bashkëshorte, si mikja e tij mirëkuptuese
e gjithashtu si muze e frymëzimit të tij.
Pavarësisht dashurisë së madhe për njëri-tjetrin,
martesa e tyre nuk i shpëton dot krizës , e cila do të shërbejë deri në krisjen
e kësaj marrëdhënie të vështirë.
Ky libër rrëfen në mënyrën më afër zemrës shkëndijat e
dashurisë, përpjekjet për të mbajtur ndezur vatrën e dashurisë përgjatë martesës,
vështirësitë e sfidat, furtunat e stuhitë, zhgënjimin prej tradhëtisë dhe
mungesës së besnikërisë dhe dhimbjen e ndarjes.
Gjithashtu, mënyra sesi shkrimtarja ka ndërtuar romanin duke
përfshirë atmosferën e Parisit të atyre viteve, natyralisht dhe ëmbëlsisht të bën të
jetosh për pak kohë në atë Paris. Të endesh nëpër rrugët e këtij qyteti magjik, të
ulesh nëpër kafenetë e këndshme, të bëhësh shpirti i mbrëmjeve festive e të
duash të kërcesh, të dehesh e dëfrehesh. Për më tepër sjellja e shkrimtarëve të
njohur si individ të thjeshtë, duke i hequr të gjithe petkat e famës dhe të
suksesit, por duke i përplasur me vyrtytet e mangësitë e karakterit të tyre është
një nga pikat kyçe të romanit.
Dashamirësia me të cilën autorja trajton Hadley dhe
realiteti me të cilin përball Ernestin nuk e bën këtë të fundit të urryer për
lexuesit, pavarësisht sjelljes e vendimeve të tij dhe kjo është mjeshtëria e
McClain.
Për ta përmbledhur, libri ‘’Një grua në Paris’’ është i
bukur, romantik, i trajtuar me elegancë dhe hapet si një dritare për një botë të
panjohur, siç mund të jetë jeta personale e një shkrimtari, i cili ka
influencuar çdo lexues të tij.
Ju ftoj në leximin e ‘’Një grua në Paris’’ shkruar nga Paula
McCain!
Rilexohemi së shpejti,
*Ky artikull nuk lejohet të ribotohet pa lejen e autores.
©RE
*Ky artikull nuk lejohet të ribotohet pa lejen e autores.
Kontaktoni: njetuferrezeshneperre@gmail.com
Comments
Post a Comment