Jeta lulëzon, zbukurohet e merr kuptim prej vajzave e grave. Këtë e kuptoj cdo ditë si shëmbull i gjallë në familjen, ku pata fatin e mirë të lindesha.
Duke u rritur në një shtëpi djemsh me përkujdesjen më delikate, dashurinë e pakufijtë, me shëmbuj për të më mësuar vlerat e pavarësisë, buzëqeshjes e lirisë së zgjedhjeve mund të them se në 8 Mars nuk duhet folur vetëm për dhunë e vuajtje.
Duke jetuar cdo ditë në një familje të harmonizuar, ku gjithcka vendoset në funksion të dashurisë, respektit, vlerave të lirisë dhe edukimit, prindërit e mi kanë afirmuar cdo ditë të jetes sime, vlerat e të qënit vajzë. Ata nuk janë ndalur së konfirmuari se një vajzë është një bekim i jashtëzakonshëm e kjo mrekulli e Zotit duhet trajtuar me butësi e ëmbëlsi, për t'u rritur e fortë dhe e shëndetshme.
Gjithcka kam mësuar nga të shtrenjtët e mi është se për të rritur vajza të forta nuk është nevoja të përdoret asnjë grimcë ashpërsi; për të rritur vajza të pavarura nuk duhet ushqyer arrogancë. Mbill dashuri e do korrësh dashuri.
Për të qënë të zonja, të arrira, të respektuara, të dashura e të bukura duhet vetëm dëshira e pakufijtë për arsimimin, për të zgjeruar horizontet e për të mos konsideruar asnjë pengesë si pamundësi për të realizuar ëndrrat.
Vajzat duke investuar në një shpirt të pastër e të sinqertë e një mendje të ndritur e të lirë, gjithë jeta e tyre do jetë e mbushur me dashuri, zgjedhje inteligjente e mirësi.
Ndaj në festa e në ditë të zakonta, mos harro se dhurata më e çmuar është dija!
Përditshmëria e një vajze e gruaje duhet të jetë një festë e pandalshme, ashtu siç është ujvara e bekimeve që lindin bashkë me të.
Comments
Post a Comment