Gjatë leximit, përveç përvetësimit të njohurive të reja,
pasurimit të fjalorit, mishërimit të dijeve, zhvillimit të imagjinatës,
kalitjes së durimit dhe ndërtimit të vyrtytit të empatisë, mes lexuesit dhe
personazheve krijohet një marrëdhënie imagjinare, thuajse e pashpjegueshme, e
cila mundet të ndryshojë përgjithnjë jetën. Personazhet e librave jo gjithnjë
janë të veçantë apo të aftë të ndikojnë tërësisht botëkuptimin e lexuesit, por
në mesin e tyre mund të gjesh nga ata që të kanë frymëzuar duke u shndërruar në
të paharrueshëm, në modele për t’u ndjekur dhe miq me mësime të vyera. Më poshtë,
do të gjeni pesë personazhet, të cilët kanë ndikuar thellësisht tek unë, në çaste
të ndryshme jetësore.
1.Hamleti
Hamleti është një nga personazhet më enigmatike të
Shekspirit, i cili mençurinë, filozofinë dhe mprehtësinë e tij e fsheh mes
rrethanave. Gjithnjë e kam admiruar për guximin, luftën e hapur me të gjithë për
të vënë në vend të vërtetën e babait të tij; vetëflijimin për arritjen e qëllimit
të tij madhor; konceptin e tij mbi dashurinë dhe përgjegjësinë e jashtëzakonshme
për Mbretërinë e tij.Kur e kam lexuar për herë të parë Hamletin, në një moshe
fare të re, pothuajse e kam patur të vështirë të kuptoj të gjitha prapaskenat e
mendimeve të tij të pazakonta, por me bindje mund të them se nga Hamleti kam mësuar
peshën e heshtjes me qëllim vënien e drejtësisë në vend e njëkohësisht kam
kuptuar se ruajtja e qetësisë me hileqarët, herët apo vonë do të japi titullin
e fitimtarit.
2. Uilliam Stivens
Një nga librat e mi të parapëlqyer prej vitit të shkuar ka qënë
‘’Dita e mbetur’’ shkruar nga Nobelisti Kazuo Ishiguro. Në këtë libër gjeta
paqen, mirësinë dhe motivimin për të cilin kisha aq shumë nevojë. Gjatë
leximit, personazhi kryesor Zoti Stivens, i cili luante rolin e narratorit në
rrëfim dhe shërbente një jetë të tërë në Darlington Hall ishte shëmbulli i
njeriut të besuar, dinjitoz dhe me integritet të lartë, i cili për hir të
besnikërisë dhe elegancës së tij në marrëdheniet me njerëzit është i gatshëm të
sakrifikojë marrëdhëniet e tij vetjake. Stivens më ka mësuar mbi mirënjohjen,
sakrifikimin e dashurisë për të respektuar vendimet e të tjerëve, përulësinë, e
cila e bëntë njeri të nderuar dhe të qënit gjithnjë falenderues.
3.Kozeta
‘’Të mjerët’’ konsiderohet vepra më kuptimplotë dhe përfaqësuese
shkruar nga Viktor Hygo. Ndër atë galeri të pasur personazh, e parapëlqyera ime
ka qënë gjithnjë Kozeta. Kozeta, një vajzë e vogël, jetime dhe pa përkrahje e
cila endej rrugëve të Parisit preku ndjeshmërinë time, qysh kur unë isha rreth
8 vjeç. Që prej asaj kohe, Kozeta përfaqëson për mua fëmijën e rritur në një mënyrë
a një tjetër, që nuk ndjeu kurrë dashuri prindërore të vërtetë e që jeta e
endte mes mijëra peripecish.
4. Edmond Dantes
Edmond Dantes njohur ndryshe si Konti i Monte Kristos është
një nga personazhet më të dashura të letërsisë botërore. Dante përfaqëson
njeriun e ndershëm, të mençur dhe zemërmirë, i cili shndërrohet tërësisht pas dënimit mbi akuzat e një krimi. Rikthimi i tij, me
gjitë hakëmarrjen dhe ashpërsinë, shpërblen këdo që e ndihmoi duke dhënë kështu
shëmbullin e transformimit njërëzor, por duke ruajtur zemrën e mirë.
5.Princi i vogël
Princi i vogël, përveçse një nga personazhet më të dashur për
mua, gjithashtu e konsideroj si një nga personazhet më edukativ. Imagjinata e
tij e larmishme, rrëfimet e bukura të mbushura me mesazhe dashurie dhe paqe, përpjekjet
për të mbajtur gjallë fëmijën brenda të gjithëve dhe pafajësia e tij, e cila ndërvepron
në çdo situatë, duke e kthyer sa komike aq edhe të adhurueshme, më bën të
mundohem të gjej mënyra sesi të rikthehem edhe një herë fëmijë. Mbase kjo është
e pamundur, por sa herë i rikthehem rileximit të këtij libri ndihem njeri më i
mirë dhe gjithnjë e më e sinqertë siç Princi është.
Në përfundim mund të them së për të paraqitur këtë listë të
shkurtër me personazhet e mi më të dashur ishte një punë e vështirë. Me siguri
kam lënë pa përmendur shumë personazhe të tjerë të mrekullueshëm, të cilët kanë
ndikuar botëkuptimin tim. Mezi pres të lexoj mbi personazhet tuaj të dashur, të
cilët kanë lënë gjurmë në jetët tuaja. Shkruamëni!
Rilexohemi së shpejti,
©RE
*Ky artikull nuk lejohet të ribotohet pa lejen e autores.
Kontaktoni: njetuferrezeshneperre@gmail.com
Comments
Post a Comment