Javën e fundit ia kam besuar shoqërinë një libri
autobiografik, i cili mes dhimbjes dhe forcës më bëri të reflektoja thellësisht
mbi marrëdhëniet njerëzore. Nëse do më pyesnin se cili libër do ju sigurojë
freski, poshtë çadrave e pranë detit, në këto ditë me vapë frymërrëmbyese është
‘’ Mami, unë dhe mami’’ shkruar nga Maya Angelou.
Me siguri keni dëgjuar për këtë personalitet të veçantë.
Angelou është artiste, shkrimtare, poete, aktiviste e të drejtave të njeriut, e
dekoruar disa herë me çmime të rëndësishme në veprimtarinë e saj humnitare dhe
në karrierën e saj artistike. Libri ‘’Mami, unë dhe mami’’ është libri i saj i
fundit autobiografik botuar në moshën 85 vjeçare dhe dedikuar tërësisht marrëdhënies
së saj me të ëmën, por njëkohësisht dhe asaj me të birin.
Rrëfimi i këtij libri ngrihet mbi dhimbjen, dhunën, mungesën
e dashurisë dhe dhimbshmërisë, marrëdhënies së distancuar nënë-fëmijë dhe një
rrugëtimi të vështirë në afrimitetin e tyre, por jo të pamundur ku në themel
mbillet sinqeriteti. Ngjarjet nisin me përshkrime prekëse mbi mungesën e figurës
atërore dhe mëmësore, përkujdesjen e gjyshes, marrëdhënies së ngushtë me vëllain
dhe një grumbull ndjenjash të padeshifruara mbi dhunën, frikën, mungesën e
komunikimit, dashurinë e pashprehur, të cilat së bashku krijonin një ngërç psikologjik
dhe emocional.
Historia e Maya Angelou tregon të gjitha etapat e një marrëdhenië
të thyer familjare, e cila rindërtohet prej respektit, sinqeritetit, mirënjohjes
dhe dashurisë duke u shndërruar në të pathyeshme. Përgjatë leximit, pasazhet
traumatike të dhunës, mungesës së dhembshurisë dhe sjelljet larg asaj njërëzorës
krijojnë empati te lexuesi duke krijuar kështu një afërsi të jashtëzakonshme me
vetë autoren.
Veçantia e këtij libri është se pavarësisht historisë së
fuqishme emocionale, dhimbjes së përjetuar dhe vështirësive të panumërta, gjatë
këtij tregimi nuk haset në asnjë shkronjë nevoja për t’u shfajsuar, për t’u
viktimizuar apo për të ndryshuar të vërtetat, sado të hidhura qofshin ato. Ky
libër është transparent, i gjallë dhe befasues, për lirinë e të dhënit të gjërave,
pavarësisht peshës së tyre të rëndë.
‘’Mami, unë dhe mami’’ është himni mbi adhurimin e figurës mëmësore
kompozuar nga e bija, e cila që pas njohjes me të ëmën, veten e konsideronte si
qenia që jo vetëm mori jetë prej Vivian, por gjithashtu mori dinjitetit,
forcën, dashurinë për veten, respektin për të tjerët, dëshirën për të ndryshuar
realitetin, adhurimin deri në brutalitet të së vërtetës. Të gjitha këto
vyrtytet, Maya u mundua për t’i përcjell tek i biri, duke treguar se të qënit
njëkohësisht nënë e fëmijë është bekimi më i madh i kësaj jete.
Ky libër është i rëndësishëm të lexohet për disa arsye
kryesore. Së pari, për shoqërinë shqiptare, ku familja shpërfytyrohet prej frikës
së të vërtetës, mungesës së komunikimit dhe opinionit të të tjerëve, i cili
shkatërron lidhjet e afërta, ky libër shërben si thirrje për të qënë të hapur,
jo paragjykues e për të vlerësuar vendimet e të tjerëve, pa patur dëshirën e
ndikimit në to. Së dyti, rrëfimi i ndjerë dhe plot ngjyra i Maya Angelou ngre
një çështje të rëndësishme, siç është racizmi. Mesazhet e thella mbi paqen, mirëkuptimin,
tolerancën dhe dashurinë, që përcillen në këtë libër janë një prekje shëruese për
plagët globale, me të cilat secili nga ne haset herët apo vonë. Së treti,
autobiografi të tilla, të pa autocensuruara, në të cilat ndërshfaqen mendimet e
vërteta pa filtra dhe pa frikën e mospëlqimit të lexuesve të gjërë janë tëpër të
rralla për letërsinë shqipe, e me siguri lexuesi shqiptar ka nevojë të menjëherëshme
të përballet me to, si një mundësi për të çliruar veten nga komplekset e
panevojshme.
Në përfundim, prej leximi të këtij libri do të huazoni mësime
të vërteta dashurie dhe sakrifice. Shkruar në mënyrë rrjedhëse, e cila të mban
mbërthyer dhe përshkruar cdo ngjarje me detaje të hollësishme, duke të krijuar
ndjesinë e të parit të një filmi, plot mësime të vyera njerëzore.
Ju ftoj në leximin e ''Mami, unë dhe mami'' shkruar nga Maya
Angelou dhe sjell në shqip nga Botimet Pegi!
Rilexohemi së shpejti,
©RE
*Ky artikull nuk lejohet të ribotohet pa lejen e autores.
Kontaktoni: njetuferrezeshneperre@gmail.com
Comments
Post a Comment