Vetëizolimi nuk është
aq i papërballueshëm, sidomos për dikë që dashuron librat.
Kjo periudhë e
cuditshme, e cila bëri të ndryshojë tërësisht përditshmëria jonë, aktivitetet,
rutina e mbi të gjitha mendësia mbi kujdesin ndaj shëndetit, të dashurve dhe
vetes ka shërbyer si një reflektim rrënjësor.
Pas muaj të tërë shkëputur
tërësisht nga blogu, por jo nga librat, mes vështirësisë së mirëmenaxhimit të
kohës, punëve të cilat nuk mbarojnë kurrë e ndonjëherë neglizhencës që të
kaplon pas një heshtje të gjatë, kjo periudhë “ngujimi” më rikthen në qoshkën
time të vogël, që e ndërtova me dashuri.
Heshtja ime e gjatë
disa mujore ka vetëm një arsye: ngarkesën mes jetës studentore dhe punës e
gjithashtu asaj pak hapësire të krijuar për të afërmit e miqtë. Nuk do shtjelloj
më gjatë pse “Një tufë rrezesh nëpër RE” është mbushur me mungesa të
pajustifikuara, por mund të them se ndihem sërisht e motivuar për të rinisur ëndrrën
e lënë për pak reflektim.
Brenda kësaj vorbulle
paniku, ku kryefjala e përditshmërisë sonë është shndërruar një emër aq sa i
frikshëm edhe thuajse i panjohur e i papritur, thirrjet për të qëndruar në shtëpi
janë më e pakta që mund të bëjmë për veten dhe të dashurit tanë. Shtëpia është
strehëza e ëmbël në të cilën nuk do mërzitesha kurrë. Natyrisht, në një
hapësirë ku promovohen librat dhe leximi nuk do gjenit asgjë tjetër veçse disa
sugjerime librash për këto ditë të pazakonta.
Në kushtet e mungesës së lirisë, librat janë
dritarja nga e cila duhet të hedhim vështrimin. Një jetë e jetuar mes librash,
peshon sa mijëra të tilla, pikërisht prej emocioneve, përjetimeve, empatisë, mësimeve
të vlefshme, dijes dhe udhëtimit sa në një botë në tjetrën. Në këtë shkrim të
ri dua të ndaj me ju disa sugjerime librash që do e bënin kohën e kaluar mes të
ëmblësh shtëpi edhe më të këndshme e orët e shpenzuara panevojë në internet
edhe më të pakta.
Libri i parë që dua të sjell në vëmëndjen tuaj është “ Dashuri në kohërat e kolerës” shkruar nga
autori i mirënjohur Gabriel Garcia Marquez. Javët e fundit ky titull mbase është përdorur
shpesh si lajtmotiv duke bërë një paralelizëm me situatën në të cilën po jetojmë
e duke hilarizuar distancimin me më të dashurit, por përtej kësaj ky është
libri që të udhëzon në rrugën e bukur e të vështirë të dashurisë. Ky roman i
shkruar me aq finesë dhe pasion shërben si balsam për të zbutur cdo paragjykim
për format e dashurisë, për të sheshuar të gjitha keqkuptimet që lindin prej
saj e për të kujtuar dhe njëherë më shumë se kurrë se jeta nuk është aq e gjatë
sa për të zgjedhur mos të dashurosh. Ky do jetë libri që do ju bëj të mbani
gjallë shprësën në këto ditë të vështira
e do ndezi qindra dritëza emocionesh brenda jush, që mund të jenë shuar nga
ankthi e pasiguria.
Libri i dytë që dua të sjell në vëmëndjen tuaj është
“ Gruaja qe donte t’i arratisej lajmit te keq” shkruar nga David Grossman. Në këto
kohë të vështira, ku dashurinë për jetën e shprehim duke luftuar me lirinë e
duke sakrifikuar për t’i qëndruar larg njëri-tjetrit, ky libër rikthen në vëmëndje
kronikat e një luftë të dhimbshme. Një libër i fuqishëm dhe tronditës, i
shkruar në një mënyrë mbresëlënëse, që depërton thellë në mëndësinë e lexuesit
duke ngritur këmbanat e alarmit për rëndësinë e jetës, vlerën e paqes dhe peshën
e familjes.
Libri i tretë, i cili më vjen natyrshëm në mëndje si
një sugjerim për ta ndarë sëbashku është një thesar i vërtetë për të cilin
ndihem me shumë fat që e zotëroj në biblotekën e familjes e nuk jam e sigurt në
mund të gjendet ende lehtësisht. Bëhet fjalë për një përmbledhje të vjetër “Poezi
spanjolle të shekullit XX” shqipërar nga Aurel Plasari, redaktuar nga Xhevahir
Spahiu e recensuar nga Dritëro Agolli, Dalan Shapllo e Hesus Ernandes. Këto
figura të mirënjohura të fushës së letrave flasin vetë për këtë libër. Përmes
poezive spanjolle shpaloset një botë e ngrohtë e ekzotike në të cilën shtegton
me të gjithë shqisat. Poezi plot ndjenjë, të fuqishme, pasionante, të gërshetuara gjithnjë më bukuritë natyrore dhe
me stilistik të spikatur, të cilat do doja shumë t’i ndaja me ju.
Në pamundësi për të publikuar cdo poezi të librit, më
poshtë gjeni njërën prej tyre shkruar nga Blas de Otero, një nga poetët më të
shquar spanjoll, i cili karakterizohet nga shprehjet e tij të drejtpërdrejta
ndaj popullit dhe thirrjet për atdhedashuri.
BESIMI
Kam
besim te njeriu. Pashë
Kurrize
copëtar me kamxhik,
Shpirtra
të verbuar që ecin trokthi
Si
Spanja kaluar
Me
dhembje e uri. Dhe pata besim.
Kam
besim te paqja. Pashë.
Yje
te larta, rrathë flakërues në agim,
Që
mbushin me dritë
Lumenj
të thellë
Plot
shkumë e buçim. Dhe pata besim.
Kam
besim tek atdheu. Pashë
Shkreptima
zemërimi
Një
dashuri të akulltuar
Dhe
një thikë të rrufeshme që priste
Copëza
buke – edhe mes territ të sotëm
dhe
pata besim.
Së fundmi, tanimë që më tepër se kurrë jemi në kërkim
të besimit dhe kurajos, mungesat në “Një tufë rrezesh nëpër RE” nuk do jenë
kurrsesi kaq të gjata. Duke ju falenderuar me gjithë zemër që edhe në mungesë
të aktivitetit tim në blog, më keni shkruar e keni rilexuar shkrimet e vjetra,
ju dëshiroj shëndet e kujdesuni që kjo kohë të jetë sa më e frutshme për ju!
Rilexohemi shumë shpejt,
*Ky artikull nuk lejohet të ribotohet pa lejen e autores.
©RE
*Ky artikull nuk lejohet të ribotohet pa lejen e autores.
Kontaktoni: njetuferrezeshneperre@gmail.com
Comments
Post a Comment