Jeta studentore ka nisur zyrtarisht në të gjitha nivelet e studimeve dhe sidomos me mësimin online situata mund të bëhet pak më e vështirë për t’u menaxhuar. Për këtë arsye do duhet një organizim më i mirë nga vetë ne. Tani që jeta jonë zhvillohet sa në një ekran inteligjent në tjetrin duhet të gjejmë mënyrat për të menaxhuar gjithçka e për të përballuar me sukses ngarkesën. Sot në #njetuferrezeshneperre dua të ndaj me ju disa aplikacione online, të cilat do kthehen në miqtë tuaj besnik për produktivitetin dhe menaxhimin e kohës.
Notion
Notion është kthyer në aplikacionin tim të parapëlqyer që pas zbulimit të tij. Mund të them me plot gojë se është jo vetëm një agenda virtuale, por një organizuese e përsosur e gjithë jetës tënde. Me Notion mund të planifikosh javën; të mbash shënime; të menaxhosh jetën studentore; të ndjekësh ecurinë e projekteve; të mbash kontakte; të mbash parasysh objektivat e tua afatgjatë e afatshkurtër; të kontrollosh zakonet e tua të shpenzimeve e me pak fjalë të zgjidhësh gjithçka që në jetën tënde duket një pirg i pandreqshëm rrëmuje.
Lajmi i mirë është se mund të përdoret falas dhe më besoni se do ju ndihmojë të ndryshoni plotësisht mënyrën sesi e organizoni ditën dhe kohën tuaj.
Forest
Aplikacioni Forest është një nga më interesantët që ndihmon në përqëndrim dhe në bllokimin e kohës tënde me detyrat që i vendos vetes sipas prioritetit. Ajo që ti planifikon nëpërmjet Forest është kohëzgjatja për secilën detyrë. Duke i qëndruar besnik kohës se dedikuar për punët e tua sipas kategorive t’i arrin të rrisësh pemë të ndryshme virtuale, të cilat kthehen në pemë reale të mbjella në rastet kur shpenzohen monedhat virtuale.
Misioni i mrekullueshëm që ky aplikacion ka të bën që të jesh i dobishëm për shoqërine duke kontribuar në krijimin e një mjedisi më të shëndetëshem e pyllëzuar e gjithashtu në mënyrën e dobishme sesi përdor kohën tënde pa u shpërqëndruar nga telefoni. Nëse je një nga njerëzit që telefoni nuk të lejon të bësh asgjë më shumë se pesë minuta i përqëndruar, së pari mos u dëshpero pasi nuk je i vetmi dhe së dyti duhet të provosh Forest. :)
Mendeley
Jeta studentore është e mbushura me detyra voluminoze të cilat kërkojnë seriozitet dhe punë impenjative. Nëse të është dashur të bësh një kërkim të mirëfilltë shkencor më parë; ke punuar për temën e diplomës apo ke kuptuar rëndësinë dhe kohën që merr sistemimi i citimeve dhe referencave në mënyrë profesionale, pasi të njihesh me Mendeley do kuptosh se jeta jote do thjeshtësohet.
Ky aplikacion është ndërtuar në formën e një platforme akademike, e cila ndihmon në kërkimin tënd shkencor, në organizimin e punës tënde shkencore e gjithashtu në njohjen me profesionist të tjerë të angazhuar.
Të gjithë ata që kanë nevojë për burime të ndryshme përsa i përket punëve shkencore duhet absolutisht t’i hedhin një sy.
MindMup
Cila është pjesa më e bezdisshme e përvetësimit të leksioneve për ju? Për mua është strukturimi i leksioneve voluminoze, të cilat marrin kohë të konsiderueshme për t’u shndërruar në koncepte të lexueshme lehtësisht dhe skematikisht. Me pak fjalë po ju tregoj dhe mënyrën time të të studiuarit dhe ajo është MindMup. Me MindMup secili mund të arrijë të përqëndrohet në konceptet kryesore, fjalët kyçe, shembujt pikëza të rëndësishme etj.
Skemat janë mënyra më e mirë e të mësuarit thellësisht dhe jo përmendësh, duke bërë që mos t’i humbasësh më kurrë njohuritë e tua.
MindMup do jetë lehtësuesi i sezonit tuaj të provimeve!!
Në përfundim mund të them se këto aplikacione shërbejnë vëtëm për t’ju angazhuar më shumë në mbajtjen nën kontroll të ngarkesës suaj studentore. Edhe nëse nuk do jeni dot sistematik në përdorimin e të gjithëve, mbajini në mend si mjete që mund të lehtësojnë përditshmërinë tuaj e të punoni mençurisht e jo me mundim.
Lexohemi shpejt,
©RE
*Ky artikull nuk lejohet të ribotohet pa lejen e autores.
Comments
Post a Comment