Dua të flas për një ëndërr, për ëndrrën time të madhe…
Unë jam një ëndërrimtare, robinë e shpresës dhe
lirisë. Prej më tëpër se katër vitesh kam punuar me durim për të ndërtuar një
qoshkë të vockël gëzimi, rrezatimi e shprese, në një rrjet të mbingarkuar nga
imazhet e vjedhura, nga personazhet sipërfaqësore e shumë pak shpirt.
“Një tufë rrezesh nëpër RE” lindi si një uri e jashtëzakonshme
për të shprehur veten; pasionin tim për leximin; gjithçka kisha hasur qysh prej
lindjes në botën e librave; pak nga dashuria ime për arsimin; këmbëngulja për të
ndjekur ëndrrat e për të mos u ndalur kurrë. “Një tufë rrezesh nëpër RE” u shndërrua
shpejt në një formë ditari publik, aktiv, të lexuar, i cili mori vëmëndje në
media dhe u cilësua si blogu i pazakontë, i cili promovonte libra e lexim.
Pak histori
Emri i blogut ka lindur në një ditë, kur nuk ndihesha mirë emocionalisht, por frymëzimi më
kishte kapluar të tërën. Mes një ngatërrese të vogël mendimesh nuk më shqitej
nga mendja kjo frazë. Kuptimi i emrit mund të interpretohet në disa
këndvështrime. Së pari, në një këndvështrim sipërfaqësor ne mendojmë se realiteti
i hidhur tregon se të rinjtë lexojnë pak dhe kjo është tepër e trishtë, kështu
blogu kërkon t’i sjellë pakëz dritë diturie kësaj reje të errët dembelizmi. Së
dyti, përditshmëria jonë jo rrallë herë është e pushtuar prej monotonisë dhe
blogu shërben pikërisht për të përçuar një frymëmarrje diellore në jëtët tona.
Kështu me miqtë që shtoheshin; dashurinë e tyre që më
ngrohte zemrën; mesazhet e bukura e shumë mbështetje, mendja më shkoi në
krijimin e një Klub Virtual Libri, me
shumë gjasa i pari online në Shqipëri, i cili asokohe quhej #rrembelibrin e
funksionoi i tëri online për rreth dy vite. Klubi i Librit më pasuroi jetën me
miq të mirë, të rinj të kulturuar e me mendje të ndritura, njërëz me shpirt të
bukur e lexues besnik.
“Një tufe rrezesh nëpër RE” evoloi e u rrit bashkë
me mua. Edhe pse e krijova për të ngushëlluar veten kur isha ende në vit të dytë
të studimeve të mia për financë, të cilat aso kohë më dukeshin drama më e madhe
e jetës e brakisja e ëndrrës sime të përjetshme për letërsinë e kritikën
letrare më bënte të ndjeja vërtetë dhimbje, ndaj blogu ia doli të mbante gjallë
ëndrrën e madje të kthehej në një mekanizëm të fuqishëm frymëzimi dhe një laborator
idesh sesi vitet e mia të studimit me mund, rezultate të shkëlqyera dhe grind,
në fakt të viheshin në funksion të librave.
Kështu sot, në përfundim të studimeve mastër për
financë e si një marketuese digjitale në profesion unë vendosa të marr në dorë
frerët e ëndrrës sime të vockël, të madhe.Eksperienca si lexuese e vëmendshme, interesi
për gjithçka qe lidhet me librat dhe pasioni për biznesin më bën të analizoja çfarë
nuk shkon në tregun e librit shqiptar.
Kështu vendosa te krijoj NEFOS, një librari
dixhitale ku çdo libër që porosisni do ju mbërrijë në shtëpi për disa orë.
Pse NEFOS?
NEFOS është një derivat i “Një tufë rrezesh nëpër
RE” dhe kuptimi i vetë emrit do të thotë pikërisht RE. Nga mitologjia greke,
prej të cilës edhe unë gëzoj emrin tim, Nefeli ( thënë ndryshe Nefos në gjuhën
greke) është hyjnesha që personifikon retë, me freskinë e bardhësinë e tyre.
Kështu, NEFOS u ndërtua si Olimpi i Librave, si vendi ku librat lartësohen ashtu si hyjnitë; si foleza ku librat dashurohen, respektohen, e mbi të gjitha sugjerohen me shumë kujdes. NEFOS nuk është një librari e zakontë online, por vendi ku gjeni gjithçka ju vjen në mendje lidhur me librat. Përveçse një librari me korrektësinë dhe përgjegjësinë për t’iu përgjigjur çdo kërkesë, NEFOS do shërbejë si një organizator i aktiviteteve letrare e kulturore; takimeve me shkrimtarët e lexuesit; njërëz të botës së letrave; evente të gjithfarë forme në shprehjen e dashamirësisë ndaj librit e leximit.
NEFOS është konceptuar si miku juaj i xhepit; këshilluesi
i leximeve dhe një eksperiencë e paprekur deri më tani nga libraritë në Shqipëri.
NEFOS është përbushësi i estetikës duke nisur nga paketimi; ndihmuesi në
zgjedhjen e titullit të duhur; udhëtari korrekt në destinacion dhe miku i përhershëm
yti pas blerjes tënde të parë. NEFOS është më tepër se një librari, një eksperiencë
që përmbush të gjitha nevojat e tua si lexues periodik a sporadik e dashamirës i
aktiviteteve dhe librave.
Aktiviteti i parë të cilit mund t’i bashkoheni është
Klubi Virtual i Librit Nefos, i cili do të funksionojë tërësisht online, me një
organizim të mirëmenduar, funksional e surpriza të përmuajshme.
Për t’u anëtarësuar kontakto në @nefos.al në
Instagram ose nefosalbania@gmail.com
Dy fjalë për Rean
Të flasësh për vetën është një situatë vërtetë e parehatshme, por jo kur e di që përballë qëndrojnë miq lexues mirëkuptues.
Unë jam Rea. Përfytyromë
si një vajzë me një mal me ëndrra në kokë; një tufë me libra në duar; një buzëqeshje
të stampuar në çdo rast dhe këmbëngulëse për çdo pikësynim
Ndryshe nga studimet e mia, pasionet nuk lidhen me shifrat, por me artin dhe letërsinë. Zgjedhja e profesionit tim ishte diametralisht e kundërt nga ajo që të gjithë prisnin nga unë. Letërsia është dashuria ime e parë, por unë nuk doja të kufizohesha vetëm në këtë fushë. Vendosa të studioj mbi botën financiare dhe atë bankare për të pasur një formim më të plotë dhe pse jo, për të zhvilluar disa aftësi sipërmarrëse, të cilat mund të më drejtojnë në udhën e kthimit të pasionit tim të parë në biznes. Ideja për të pasur një blog, i cili i kushtohet tërësisht botës së letrave, librave, letërsisë dhe dashurisë sime për të shkruarit ka lindur vite më parë, kur isha rreth 14 vjeç. Duke pasur parasysh se miqtë dhe të afërmit më kërkonin gjithnjë sugjerime në lidhje me librat dhe letërsinë, mendova që këto informacione mos të kufizohen vetëm në rrethin tim të ngushtë. Kështu lindi “Një tufë rrezesh nëpër RE”. Blogu u krijua për të shërbyer si një urë lidhëse mes të rinjve dhe librave, të cilët për hir të së vërtetës, kohët e fundit duken të braktisur prej lexuesve. Ndërsa Nefos është projekti që jo vetëm do vihet në shërbim të afrimit tuaj me librat emocionalisht, por do sigurohet që librat tuaj të mbërrijnë në duart tuaja e do kujdeset që të merrni më të mirën e tyre duke i lexuar.
Realizimi i kësaj ëndrre nuk do behej e munduar pa ju,
pa të gjithë ata që kanë lexuar blogun, që kanë besuar në sugjerimet e mia, që
më kanë shtyrë për të mos hequr dorë.
Sot, sërish nga JU, miqtë e mi të mirë kërkoj mbështetje e vëmendje në punën e NEFOS. Pasioni do ju bëjë të afroheni në Olimpin e Librave, në NEFOS.
Ju falenderoj nga zemra!
Juaja,
©RE
*Ky artikull nuk lejohet të ribotohet pa lejen e autores.
Comments
Post a Comment