Shkëputja nga pasioni është një zemërthyerje e vërtetë, sidomos kur pas një pushimi të gjatë të pushton pakëz ndjenjë faji e copëza mërzi për gjithë këto muaj të humbur. Një tufë rrezesh nëpër RE dhe Nefos edhe pse janë krijuar nga një lexuese e ethshme për gjithë dashamirësit e librave nuk kanë qenë kurrë hapësira, ku predikimi për leximin kthehet në i mërzitshëm. Fatkeqësisht, përditshmëria, punët, shkolla, aktivitetet e angazhimet nuk na krijojnë gjithnjë mundësinë për të qënë lexuesit e përpiktë. Megjithatë, këtu jemi për ta rregulluar këtë së bashku.
Si një rikujtesë të vockël, për këdo që ka ca kohë që i është
larguar leximit e po përballet kohët e fundit me ndonjë vështirësi (krejtësisht të parëndësishme nëse nuk lidhet
me shëndetin), sot dua të ndaj me ju disa arsye pse leximi është forma më e këndshme
e kujdesit ndaj vetes. Megjithë këto lajme bombastike në rrjet rreth kujdesit për
vetën parë në këndveshtrimin e një lekurë të shndritshme, flokëve të mahnitshëm
e trupit të skulpturuar, pak për të thënë aspak kam vënë re të flitet për
leximin, si një nga format më të rëndësishme të kujdesit për shëndetin mendor
dhe emocional.
Më poshtë po ndaj me ju përfitimet që kam hasur prej vitesh
prej leximit në jetën time:
- Leximi ndihmon të shuash botën.
Kaosi në të cilin jetojmë ka nevojë të shuhet hera-herës.
Natyrisht, kjo është nga gjërat më të vështira për t’u kryer me vetëdije kur je
para udhëkryqesh të mëdha jetësore, por është e vetmja mënyrë për t’u rikthyer
tek vetja. Leximi hap lehtësisht portat e një bote tjetër, cilin do zhaner
librash të zgjidhni. Arratisja nga realiteti ndihmon me lehtësimin nga stresi
dhe qetësimin e ankthit.
Problemet me ankthin konsiderohen ende si një stigmë për t’u
diskutuar në shoqëritë që shëndetin emocional e psikologjik nuk e kanë aq parësor,
por kjo nuk do të thotë se këto përshtjellime nuk I përjeton secili prej nesh.
Në të tilla raste mjafton të dëgjosh zërin e brendshëm rreth preferencave të leximit e të mos nisesh të lexosh çfarë sugjeron njëri e cilin libër të dhuron tjetri. Lexo çfarëdo që të bën të ndihesh më mirë!
- Leximi parandalon sëmundje.
Prej leximit kam vënë re se kam kultivuar një memorie të jashtëzakonshme. Të lexuarit është një formë aktiviteti për mendjen dhe është e vërtetuar se leximi parandalon sëmundje si Alzheimer. Gjithashtu, pas ndonjë shkëputje të konsiderueshme ndaj leximit kam hasur jo vëtëm vështirësi në përqëndrim, por njëkohësisht edhe kujtesë të shkurtër të çuditshme. Askujt nuk I duhen këto probleme, ndaj leximi duhet të shndërruar në një aktivitet ditor të rëndësishëm.
- Leximi ndihmon të pushosh më mirë.
Thuhet se për të përgatitur trupin të pushojë ndihmon aroma e livandos, çaji i kamomilit e shkëputja nga ekranet elektronik, ndërsa unë kam vënë re se për të pushuar më mirë ndihmon leximi. Leximi në mbrëmje është mënyra më e mirë për t’I dhënë trurit sinjalet e pushimit dhe ndihmon përnjëherë me pagjumësinë.
- Leximi stimulon empatinë.
Empatia është vyrtyt i një njeriu me inteligjencë të kultivuar emocionale. Kjo e fundit është arma më e rëndësishme e botës në të cilën jetojmë si në aspektin profesional edhe në atë personal. Për të mos harruar që është tipar dallues i liderave të vërtetë. Të gjitha këto karakteristika, të cilat do të bëjnë të diferencohesh tërësisht nga të tjerët janë vëtëm disa orë leximi në ditë larg. J
- Leximi ndez kreativitetin.
Me siguri është e pamundur që të zotërosh talente artistike e një mendje inovative e mos ta vizitosh kurrë bibliotekën. Leximi është një ushqyes i përditshëm i kreativitetit dhe krijon mënyra të mrekullueshme e të veçanta të menduari, që vetëm një tjetër lexues i kupton.
Me anë të këtyre përfitimeve si formë e kujdesit të vetes nëpërmjet leximit, jo vëtëm dëshiroja të rikthehesha mes jush, por njëkohësisht t’i rikujtoja vetes gjithë të mirat që leximi e librat më kanë dhënë, duke shpresuar se mund të frymëzojnë ndokënd.
Lexohemi shumë më shpejt sesa mendoni J,
©RE
*Ky artikull nuk lejohet të ribotohet pa lejen e autores.
Comments
Post a Comment