Tri librat bashkëkohor me të cilët adoleshentët do ndërtonin konceptin e lirisë

Adoleshenca është periudha në të cilën leximi i librave duhet të gëlojë. Kjo fazë kaq e rëndësishme i jep formë lexuesit të rritur pas disa vitesh dhe është çelësi që do tregoi se cilës letërsi do i drejtohet i rrituri në vitet e ardhshme. Adoleshenca është periudha ku klasikët duhet të përpihen, të lexohen me një frymë e të ngjiset në shpirt dashuria për librat e mirë.

Gjithashtu në këtë periudhë lexuesi duhet të aftësohet për të zgjedhur libra me vlërë; duhet të mësojë të analizojë; të ushqejë inteligjencën emocionale e t’i japi jetë ëndrrave të tij. Librat janë një çast qetësie në ato beteja kaotike lufte me veten e të tjerët për të njohur idenditetin tënd; trupin; shpirtin dhe mendjen.

Sot në #njëtufërrezeshnëperre dua të ndaj me ju tri libra bashkëkohor të cilët nuk duhet të mungojnë në leximet e bukura të adoleshencës, për të ndërtuar konceptin e lirisë së individit në një botë që ka ende shumë për të bërë në këtë drejtim.

 

1.      Poezitë e Teodor Kekos

Nuk kam arritur të flas kurrë për Kekon në hapësirën time mjaftueshëm, aq sa e dua atë . Keko është poeti, shkrimtari e publicist fisnik, i cili përcjell finesën dhe rebelizmin e tij në gjithçka ka shkruar. Keko është poeti delikat, që të rrëmben në botën e tij, ku qeveris liria.

Poezitë e Kekos mbartin shpirtin e tij në çdo varg. Figuracioni e ngjyrat e larmishme me të cilat e sheh botën të mbushin shpirtin plot. Keko është transparent, i sinqertë, i këndshëm, filozofal  e njëkohësisht  ndër poetët që i ka shkruar më bukur dashurisë në gjuhën shqipe.

Adoleshentët jo vetëm duhet të edukohen me poezitë, të cilët janë një metodë reflektimi e arrirë, por sidomos nga Keko si poet do njiheshin me dashurinë në më mënyrën më të bukur. Keko nuk është cliché; Keko nuk është i mërzitshëm; Keko nuk është një poet tradicional.

Keko hap dyert e shpirtit të tij për të shprehur çdo etapë të jetës, ashtu siç e ndjente pa maskime e pa asnjë kokëçarje mbi mendimet e lexuesit. Kekos i buron trimëria dhe liria njësoj siç flet për jetën ashtu dhe për betejat me vdekje; njësoj për fëmijët e bashkëshorten dhe për nënën; njësoj për të bukurën edhe grotesken.

Nga dashuria që kam për Dor Kekon, krijimtarinë e tij mund ta shquaj edhe në mjegull dhe kjo është ndër dashuritë më objective që mund të përjetojë njeriu në jetë. Nuk mund të lexosh Kekon dhe të mbyllës kapakun e fund-librit duke mos e dashur për njeriun e rrallë që shfaqte në krijimtarinë e tij.

Për më tepër mbi poezitë e Kekos mund të lexoni në linkun e mëposhtëm:

http://njetuferrezeshneperre.blogspot.com/2018/03/mes-kryqezimesh-te-teodor-kekos.html

 

2.      Unë jam Malala – Malala Yousafzai

Ky është një libër i pazakonte, tronditës dhe të le shumë hapësirë të meditosh. Malala tregon në vetë të parë historinë e familjes së saj, ëndrrat e një adoleshenteje, dëshirat për të ardhmen dhe njëkohësisht historinë e vendit të saj,e cila shprehet shkurtimisht nëpërmjet absurdit: ‘’ Unë vij nga një vend që u krijua në mesnatë. Kur pothuajse dhashë shpirt, ishte vetëm pas mesditës.’’

Ngjarjet e librit janë aq aktuale e të prekshme edhe sot në vende të vecanta në botë, saqe kanë aftësinë të rrënqethin e të bëjnë të lutesh për paqe dhe liri.

Ky liber arrin ta copëtoj zemrën në njëmijeenjë pjesëza e të duhet shumë kohë sa të mbledhesh pjesët e thyera, të cilat nuk ngjiten më kurë. Ato do arrijnë të ringjiten vetëm kur në botë të mos vuaje më askush nga padija, mallkimi i ligësisë dhe patolerancës. Njëkohësisht, ky libër është një burim i pastër frymëzimi. Bota e adhuroi Malalën e bashkë me të edhe unë. Vullneti i saj, këmbëngulja, mos dorëzimi dhe forca tregojnë se në një botë burrash, ku ende kryhen aborte pse foshnja është vajzë, ne mund t’ja dalim, pa u zbrabsur nga asnjë keqdashës taleban a cfarëdo emri të mbajë.

 

Përshtypjen e plotë të librit mund ta lexoni në linkun e mëposhtëm:

http://njetuferrezeshneperre.blogspot.com/2018/06/une-jam-malala-historia-e-vajzes-qe.html

 

3.      “Rrëfenja e shërbëtores” – Margaret Atwood

 

 Ky libër trajton lirinë e individit, por veçanërisht atë të gruas në një shtet totalitar e të kontrolluar, kur edhe gjërat më të thjeshta janë një luks e të kontrolluara.

 

Libri ‘’Rrëfimet e shërbëtores’’ shkruar nga Margaret Atwood është një rrëfim  i dhimbshëm, I cili të rikujton vlerën e lirisë. 

Përmbajtja e këtij romani është atipike. Ngjarjet zhvillohen në një shtet totalitar, në një realitet imaginar të së ardhmes, ku roli dhe të drejtat e grave kanë ndryshuar kryekëput. Gratë konsiderohen si pronë e shtetit dhe mungesa e lirisë e të drejtave si dhe organizimi i shtetit ka në qendër të tij terrorin dhe kufizimin. Ky libër do i edukonte adoleshentët me konceptin e lirisë së vajzave dhe grave dhe do u rrëfejë  historinë e mundimshme të të drejtave të grave duke menduar sesa shumë duhet bërë ende në këtë botë, e cila nuk është një botë burrash, por një botë dashurie.

Përshtypjet e plota të romanit mund t’i lexoni në linkun e mëposhtëm: http://njetuferrezeshneperre.blogspot.com/2019/01/rrefimet-e-sherbetores-dhe-lutjet-e.html

Në përfundim mund të them se këto janë një listë e shkurtër me libra bashkëkohor, të cilët do kontribuonin të ndërtonin idealinë e lirisë së individit tek adoleshentët. Megjithatë këto nuk janë të vetmit libra që duhen lexuar mbi këtë tëmë.

PS: Mbani pranë miqtë, por librat edhe më pranë!

Lexohemi shpejt, 

©RE

*Ky artikull nuk lejohet të ribotohet pa lejen e autores. 

Kontaktoni: njetuferrezeshneperre@gmail.com